\startsong
\stitle{ret se but na banaa ai mere achchhe fanakaar}
\singers{Ahmed Nadeem Qasmi #10}
\printtitle
#indian

ret se but na banaa ai mere achchhe fanakaar
ek lamahe ko Thahar mai.n tujhe patthar laa duu.N
mai.n tere saamane ambaar lagaa duu.N lekin
kaun se ra.ng kaa patthar tere kaam aayegaa
surK patthar jise dil kahatiihai bedil duniyaa
yaa vo pattharaa_ii hu_ii aa.Nkh kaa niilaa patthar
jis me.n sadiyo.n ke tahayyur ke pa.De ho.n Dore
kyaa tujhe ruuh ke patthar kii zaruurat hogii
jis pe haq baat bhii patthar kii tarah giratii hai
ik vo patthar hai jise kahate hai.n tahaziib-e-safed
us ke mar-mar me.n siyah Kuun jahlak jaataa hai
ik i.nsaaf kaa patthar bhii to hotaa hai magar
haath me.n teshaa-e-zar ho, to vo haath aataa hai
jitane mayaar hai.n is daur ke sab patthar hai.n
sher bhii raqs bhii tasviir-o-ginaa bhii patthar
mere ilahaam teraa zahan-e-rasaa bhii patthar
is zamaane me.n har fan kaa nishaa.N patthar hai
haath patthar hai.n tere merii zubaa.N patthar hai
ret se but na banaa ai mere achchhe fanakaar

#endindian
\endsong