\startsong
\stitle{kaabe kii hai havas kabhii kuu-e-butaa.N kii hai}
\lyrics{DaaG Dehlvi}
\singers{Daag Dehlvi}
% Contributed by Yogesh Sethi
\printtitle
#indian

kaabe kii hai havas kabhii kuu-e-butaa.N kii hai
mujh ko Kabar nahii.n merii miTTii kahaa.N kii hai

%[kuu-e-butaa.N = beloved’s street]

kuchh taazagii ho lazzat-e-aazaar ke liye
har dam mujhe talaash naye aasamaa.N kii hai

%[lazzat-e-aazar = flavour of pain; thrill of pain]

hasarat baras rahii hai mere mazaar se
kahate hai.n sab ye qabr kisii naujavaa.N kii hai

qaasid kii guftaguu se tasallii ho kis tarah
chhipatii nahii.n vo jo terii zabaa.N kii hai

sun kar meraa fasaanaa-e-Gam us ne ye kahaa
ho jaae jhuuT sach, yahii Kuubii bayaa.N kii hai

kyuu.N kar na aa_e Kuld se aadam zamiin par
mauzuu.N vahii.n vo Kuub hai, jo shay jahaa.N kii hai

%[Kuld = paradise; mauzuu.N = fit, well balanced]

urduu hai jisakaa naam hamii.n jaanate hai.n ‘Daag’
hindustaa.N me.n dhuum hamaarii zabaa.N kii hai

#endindian
\endsong