\startsong
\stitle{butaan-e-maahavash uja.Dii hu_ii ma.nzil me.n rahate hai.n}
\singers{Daag Dehlvi #22}
% Contributed by Hari and Manju Khanna
\printtitle
#indian

butaan-e-maahavash uja.Dii hu_ii ma.nzil me.n rahate hai.n
ke jis kii jaan jaatii hai usii ke dil me.n rahate hai.n

hazaaro.n hasarate.n vo hai.n ki roke se nahii.n rukatii.n
bahot armaan aise hai.n ki dil ke dil me.n rahate hai.n

Kudaa rakkhe muhabbat ke liye aabaad dono.n ghar
mai.n un ke dil me.n rahataa huu.N vo mere dil me.n rahate hai.n

zamii.n par paa.Nv nakhvat se nahii.n rakhate parii-paikar
ye goyaa is makaa.N kii duusarii ma.nzil me.n rahate hai.n

ko_ii naam-o-nishaa.N puuchhe to ai qaasid bataa denaa
taKallus "Daag" hai aur aashiqo.n ke dil me.n rahate hai.n

#endindian
\endsong