\startsong
\stitle{dil ne vafaa ke naam par kaar-e-jafaa nahii.n kiyaa}
\singers{Jaun Eliya #3}
% Contributed by Irfan Sattar
\printtitle
#indian

dil ne vafaa ke naam par kaar-e-jafaa nahii.n kiyaa
Kud ko halaak kar liyaa Kud ko fidaa nahii.n kiyaa

kaise kahe.n ke tujh ko bhii hamase hai vaastaa ko_ii
tuune to hamase aaj tak ko_ii gilaa nahii.n kiyaa

tuu bhii kisii ke baab me.n ahad-shikan ho Gaaliban
mai.n ne bhii ek shaKs kaa qarz adaa nahii.n kiyaa

jo bhii ho tum pe mautariz us ko yahii javaab do
aap bahot shariif hai.n aap ne kyaa nahii.n kiyaa

jis ko bhii sheK-o-shaah ne hukm-e-Kudaa diyaa qaraar
hamane nahii.n kiyaa vo kaam haa.N baa-Kudaa nahii.n kiyaa

nisbat-e-ilm hai bahot haakim-e-vaqt ko aziiz
us ne to kaar-e-jehl bhii be-ulaamaa nahii.n kiyaa

#endindian
\endsong