\startsong
\stitle{dil me.n ab yuu.N tere bhuule huye Gam aate hai.n}
\lyrics{Faiz Ahmed Faiz}
\singers{Faiz Ahmed Faiz}
\printtitle
#indian

dil me.n ab yuu.N tere bhuule huye Gam aate hai.n
jaise bichha.De huye kaabe me.n sanam aate hai.n

ik ik kar ke huye jaate hai.n taare raushan
merii manzil kii taraf tere qadam aate hai.n

raqs-e-may tez karo, saaz kii lay tez karo
suu-e-maiKaanaa safiiraan-e-haram aate hai.n

kuchh hamii.n ko nahii.n ehasaan uThaane kaa dimaag
vo to jab aate hai.n maa_il-ba-karam aate hai.n

aur kuchh der na guzare shab-e-furqat se kaho
dil bhii kam dukhataa hai vo yaad bhii kam aate hai.n

#endindian
\endsong