\startsong
\stitle{mujhako maaraa hai har ek dard-o-davaa se pahale}
\lyrics{Firaq Gorakhpuri}
\singers{Firaq Gorakhpuri}
\printtitle
#indian

mujhako maaraa hai har ek dard-o-davaa se pahale
dii sazaa ishq ne har jurm-o-Kataa se pahale

aatish-e-ishq bha.Dakatii hai havaa se pahale
ho.NTh jalate hai.n muhabbat me.n duaa se pahale

ab kamii kyaa hai tere be-sar-o-saamaano.n ko
kuchh na thaa terii qasam, tark-o-fanaa se pahale

ishq-e-bebaak ko daave the bahut Kalavat me.n
kho diyaa saaraa bharam sharm-o-hayaa se pahale

maut ke naam se Darate the ham, ai shauq-e-hayaat
tuune to maar hii Daalaa thaa qazaa se pahale

ham u.nhe.n paake "firaq" aur bhii kuchh khoye gaye
ye takalluf to na the ahad-e-vafaa se pahale

#endindian
\endsong