\startsong
\stitle{aaraa_ish-e-Khayaal bhii ho dil-kushaa bhii ho}
\singers{Nasir Kazmi}
\printtitle
#indian

aaraa_ish-e-Kayaal bhii ho dil-kushaa bhii ho
vo dard ab kahaa.N jise jii chaahataa bhii ho

ye kyaa ke roz ek saa Gam ek sii ummiid
is ra.nj-e-beKumaar kii ab i.ntehaa bhii ho

ye kyaa ke ek taur se guzare tamaam umr
jii chaahataa hai ab ko_ii tere sivaa bhii ho

Tuute kabhii to Kvaab-e-shab-o-roz kaa tilism
itane hujuum me.n ko_ii cheharaa nayaa bhii ho

diivaa.ngii-e-shauq ko ye dhun hai in dino.n
ghar bhii ho aur be-dar-o-diivaar saa bhii ho

juz dil ko_ii makaan nahii.n dahar me.n jahaa.N
rahazan kaa Kauf bhii na rahe dar khulaa bhii ho

har zarraa ek mahamiil-e-ibrat hai dasht kaa
lekin kise dikhaauu.N ko_ii dekhataa bhii ho

har shay pukaaratii hai pas-e-pardaa-e-sukuut
lekin kise sunaauu.N ko_ii humanavaa bhii ho

fursat me.n sun shaguftagii-e-Gu.nchaa kii sadaa
ye vo suKan nahii.n jo kisii ne kahaa bhii ho

baiThaa hai ek shaKs mere paas der se
ko_ii bhalaa-saa ho to hame.n dekhataa bhii ho

bazm-e-suKan bhii ho suKan-e-garm ke liye
taauus bolataa ho to ja.ngal haraa bhii ho

#endindian
\endsong