\startsong
\stitle{kaun kahataa hai muhabbat kii zubaa.N hotii hai}
\singers{Sahir Hoshiarpuri #1}
\printtitle
#indian

kaun kahataa hai mohabbat kii zubaa.N hotii hai
ye haqiiqat to nigaaho.n se bayaa.N hotii hai

vo na aaye to sataatii hai Kalish sii dil ko
vo jo aaye to Kalish aur javaa.N hotii hai

ruuh ko shaad kare dil ko jo puranuur kare
har nazaare me.n ye ta.nviir kahaa.N hotii hai

zabt-e-sailaab-e-mohabbat ko kahaa.N tak roke
dil me.n jo baat ho aa.Nkho.n se ayaa.N hotii hai

zi.ndagii ek sulagatii sii chitaa hai "Sahir"
sholaa ba.ntii hai na ye bhuj ke dhuaa.N hotii hai

#endindian
\endsong