\startsong
\stitle{hazaar gardish-e-shaam-o-sahar se guzare.n hai.n}
\singers{Sufi Ghulam Mustafa Tabassum #1}
\printtitle
#indian

hazaar gardish-e-shaam-o-sahar se guzare.n hai.n
vo qaafile jo terii rahaguzar se guzare.n hai.n

abhii havas ko mayyassar nahii.n dilo.n kaa gudaz
abhii ye log muqaam-e-nazar se guzare.n hai.n

har ek naqsh pe thaa tere naqsh-e-paa kaa gumaa.N
qadam qadam pe terii rahaguzar se guzare.n hai.n

na jaane kaun sii ma.nzil pe jaa ke ruk jaae.n
nazar ke qaafile diivar-o-dar se guzare.n hai.n

kuchh aur phail gaii.n dard kii kaThin raahe.n
Gam-e-firaaq ke maare jidhar se guzare.n hai.n

jahaa.N suruur mayyassar thaa jaam-o-may ke baGair
vo mayakade bhii hamaarii nazar se guzare.n hai.n

#endindian
\endsong